Айни замон, саркардагони фирории наҳзатӣ хуб медонанд, ки қабл аз судури қарори Суди Олии Федератсияи Россия дар робита бо террористӣ эътироф шудани ташкилоти террористӣ-экстремистии ҳизби наҳзати ислом сохтори минтақавии зиддитеррористии Созмони ҳамкории Шанхай 29 январи соли 2016, дар мувофиқа бо Феҳристи ягонаи созмонҳои террористӣ, экстремистӣ ва ҷудоихоҳ, ки фаъолияташон дар қаламрави давлатҳои узви СҲШ манъ аст, таҳти рақами 79 ҳизби наҳзати исломии Тоҷикистонро ба феҳристи ташкилотҳои террористӣ шомил намуда буд. СҲШ, усулан ҳамчун ниҳоди муқаввии сиёсӣ, ҳарбӣ, иқтисодӣ ва амниятӣ 8 кишвари бузурги ҷаҳониро бо шумули 3,3 миллиард аҳолӣ дар бар мегирад ва аз ҷониби ин созмони бонуфузи ҷаҳонӣ ба сифати ташкилоти террористӣ эътироф шудани ТТЭ ҲНИ маънои ба воқеият гироиш пайдо кардани ниме аз давлатмардон ва ҷомеаи дунёиро далолат мекунад.
Ба дунболи ин, СААД (Созмони Аҳдномаи амнияти дастаҷамъӣ) ТТЭ ҲНИ-ро ба сифати ташкилоти террористӣ эътироф намуд, ҳамчунин, вазири давлатии умури хориҷии Ҳиндустон, ҷаноби М. Ҷ. Шри Акбар 4 майи соли 2018 дар доираи Конфронси байналмилалии сатҳи баланд оид ба муқовимат бо терроризм ва ифротгароии хушунатомез бар асоси мадорики зарурӣ таъкид намуд, ки Ҷумҳурии Тоҷикистон дар рафъи хатар – сари вақт аз саҳнаи сиёсӣ берун кашидани гурӯҳҳои ифротгаро, хусусан ТТЭ ҲНИ пирӯз шудааст. Хатарро, қабл аз ҳама, вазири умури хориҷаи Ҳиндустон дар ТТЭ ҲНИ дида, тазаккур дода буд, ки ин созмони террористӣ на танҳо ба Тоҷикистон, балки ба кулли минтақа, минҷумла Осиёи Марказӣ таҳдиди ҷиддӣ мебошад. Ин аст, ки тасмими Суди Олии Федератсияи Россия саривақтӣ, асоснок ва амри замонию маконӣ буда, маънии барқарории адолатро дорад.
Агар саҳифаҳои таърихи муосири ватаниро дар охири солҳои ҳаштод ва ибтидои навадуми асри XX варақгардон намоем, бидуни мушкил маълум мегардад, ки наҳзат (манзур ТТЭ ҲНИ), бо такя ба пуштувонаҳои хориҷӣ дар минтақа даргириҳоро доман зад ва сабабгори бурузи ҷанги шаҳрвандӣ ва фоҷиаи хашини миллӣ дар ҷумҳурӣ шуд. Муноқишоти бемаънӣ минбаъд ба даргириҳо ва билохира ба ҷанги шаҳрвандӣ бадал гашт.
Дар натиҷаи даргириҳо, аз панҷуним миллион аҳолии кишвар, тибқи маълумоти гуногун, бештар аз саду панҷоҳ ҳазор нафар ҳалок гардид. Тақрибан ҳафтяки қисми сокинони ҷумҳурӣ иҷборан тарки хонаю Ватан намуда, ба кишварҳои Афғонистон, Покистон, Россия ва дигар мамлакатҳои ИДМ паноҳанда шуданд. ТТЭ ҲНИ ҳеҷ гоҳ ба манфиати миллату халқ кӯшиш накарда ва намекунад ва, дар маҷмуъ, ягон созмони динӣ ва мазҳабӣ, ки даъвии сиёсӣ менамояд, ба мардум вафодор нест. Баръакс, созмонҳои динӣ ба хотири комфорти сиёсию иҷтимоӣ халқ ва дини онро ҳамчун васила ва абзори расидан ба қудрат истифода мекунанд. Ин ҳақиқатест, ки дар адёни хусусияти муташаккилидошта, минҷумла исломи сиёсӣ, ба мушоҳида мерасад.
Солҳост, ки аз тариқи шабакаҳои расмии телевизионӣ барномаҳои зиёде пахш шуда, ба масъалаи терроризми динӣ-мазҳабӣ (дар симои як идда дастандаркорони ТТЭ ҲНИ) ва пуштибонони пасипардагии он ихтисос ёфта, ҳангомаю иғвогариҳои расонаии раҳбарияти наҳзатиро, ки тайи солиёни ахир ҳамарӯза дар сомонаҳои марбут ба ин созмони тахрибкор мунташир мегарданд, бо далелҳои шайъӣ фош менамоянд. Аз ҷумла, дар доираи барномаи 45-дақиқагии телевизионӣ, ки 8 августи соли 2017 аз тариқи шабакаҳои расмии телевизионӣ пахш гардида буд, муҷримони наҳзатӣ ё ба истилоҳ, «қаҳрамонон»-и намоишномаи телевизионӣ ошкоро аз ҳузури бевоситаи раёсати ташкилоти наҳзатӣ ва ҳомиёни пасипардагии он дар ибтидои солҳои навад сухан гуфта, ишора намуданд, ки дар таъсис додан, тамринҳои саривақтӣ гузарондан ва билохира ба марҳилаи ниҳоӣ расондани гурӯҳҳои вижаи тахрибкорӣ-диверсионӣ гурӯҳҳои алоҳида аз ҳисоби раҳбарияти вақти ТТЭ ҲНИ даст доштанд. Абдуқодир Абдуллоев, мулаққаб ба “Рустами Норакӣ”, Тағоймурод Ашрапов (“Алӣ”) ва Саймуҳриддин Қудратов (“Авлиё” ва “Эшон”) дар барномаи телевизионии мазкур сареҳан иқрор карданд, ки қатли ҳарбиёни дивизияи 201-и Федератсияи Россия ва кушторҳои шахсиятҳои варзидаи сиёсӣ, фикрӣ, илмӣ, адабӣ, динӣ ва фарҳангии тоҷик, аз қабили Сафаралӣ Кенҷаев, Отахон Латифӣ, Муҳаммад Осимӣ, Юсуф Исҳоқӣ, Карим Юлдошев, Минҳоҷ Ғуломов, Сайф Раҳимзоди Афардӣ, муфтии собиқ Фатҳуллохон Шарифзодаро бо супориши саркардаи ТТЭ ҲНИ ва узви он Абдуҳалим Назарзода (Ҳоҷӣ Ҳалим) анҷом додаанд. Ба ин минвол, куштори журналистони маъруф Муродалӣ Шерализода, Муҳиддин Олимпур, Отахон Латифӣ, Хушбахт Ҳайдаршо, Ҷумъахон Ҳотамӣ, Давлаталӣ Раҳмоналиев, Виктор Никулин ва Сергей Ситковский кори онҳост.
Террорҳои наҳзатӣ, ғолибан ба хотири парокандани тарс ва саранҷом дар ҷомеа тасаллут бахшидани ноамнию бесуботӣ анҷом дода шуданд. Терроризми динӣ-мазҳабӣ хашинтарин навъи терроризми байналмилалист ва ТТЭ ҲНИ дар ҳошияи ин навъи террор ба арбобони сиёсӣ, илмӣ, маданӣ ва журналистони миллӣ бархӯрд кардааст. Дар ин росто, инсони боварманд ва ғайрибоварманде, ки ба ғояҳои пӯсида ва зиддиинсонии ТТЭ ҲНИ розӣ набуда, вокунишу аксуламал нишон додааст, аз назари фикрӣ ва физикӣ террор шудааст. Тавассути афкандани ҳарос ва парокандани он дар миёни ҷомеа авомуннос таҳти тасаллут қарор мегирад ва аз тариқи фишорҳои равонӣ, ахлоқӣ, фикрӣ, идеологӣ назорат мешавад.
Бояд тазаккур дод, ки баъзе доираҳои сиёсию истихборотӣ ва созмонҳои байналмилалӣ имрӯз ҳам даст аз фаъол сохтани гурӯҳҳои тахрибкори наҳзатӣ дар дохили мамлакат барнадоштаанд. Мақомоти марбутаи давлатӣ нафарони зиёдеро боздошт кардаанд, ки аз сӯйи созмонҳои иттилоотии кишварҳои хориҷӣ сармоягузорӣ шуда, барои худкифо шудан ва баъдан ба амалиёти диверсионӣ даст задани гурӯҳҳои махсуси наҳзатӣ маблағҳои зарурӣ интиқол додаанд.
Аз шаҳодати қаблан боздоштшудаҳо Баҳриддин Қурбонов, Муҳаммадӣ Соҳибназаров ва Асрориддин Розиқов (писари яке аз саркардагони ташкилоти террористию экстремистии наҳзати исломӣ Зубайдуллоҳи Розиқ, ки барои ҳамдастӣ дар тарҳи балвои сентябрии А. Назарзода боздошт ва зиндонӣ шудааст) бармеояд, ки сохторҳои дахлдори кишварҳои хориҷӣ тавассути гумоштаҳои худ (аз ҷумла, тавассути Биҳиштӣ Соҳибназаров, Исломиддин Розиқов) барои роҳандозӣ кардани барномаҳои ҷадиди тахрибкорӣ-диверсионӣ дар минтақа маблағҳои зарурӣ ирсол кардаанд.
Сармоягузории наҳзатӣ ва доираҳои ба он наздик дар ҳаводиси ахири Бадахшон низ ба хубӣ ба мушоҳида мерасад ва ба гурӯҳҳои ҷиноятии минтақавӣ борҳо маблағҳои калони пулӣ ҷиҳати роҳандозӣ кардани барномаҳои махсус ҷудо шудааст. Ин аст, ки наҳзат имрӯз ҳам даст аз терроризму тахрибкорӣ барнадоштааст ва аз тамоми имконот ва бахусус, сармоягузориҳои хориҷӣ истифода мебарад, то ин ки авзоъро ноором сохта, амнияту суботро ба ҳам бизанад.
Акнун барои наҳзатиҳои ифротӣ, ки дар қаламрави Россия фаъолият мекунанд, душвор хоҳад шуд, зеро ки онҳо дигар ҳаққи иғвогарию ҳангомасозӣ дар заминаи ақоиди пӯсидаи ифротгароёна карданро надошта, ба даъвоҳои бебаркаши саркардагони худ лаббайк гуфта наметавонанд.
